أنا حظك

أوّل شي، بحب قول اننو في بعض المواضيع رح تكون بالعربي ..وعلى الأغلب بالشامي لأننو في عننا مصطلحات ما بتترجم متل ما رح تلاحظو بموضوع اليوم.

انا بشكل عام بآمن بالقدر مو بالحظ .. بس في مواقف بتخليني صدّق اننو في شي اسمو حظ اوفي ناس بيكون حظّون معتّر، والسبب برأي بيرجع لشي اسمو قانون الجاذبية و اللي رح احكي عننو بموضوع منفصل انشالله..

بالنسبي إلي، انا كنت مفكرة حالي محظوظة ! و عنجد كانت تزبط معي اشيا بدون ما احسبا كتير، بس باعتبار اننو شغلي بيعتمد عالحظ نوعاً ما، بلّشت اكتشف اننو لأ انا مو كتير محظوظة ! قصدي ابداً ! قصدي اننو عنجد ما بيصير الا عكس اللي بدي ياه :) وصار شعاري بالمكتب انا ورفقاتي، هوي العبارة التّالية " انا حظك المعتّر، انا حظك المشحّر ، ط* فيك ط* ، ط* فيك ط* " ، وطبعا هالجملة ما اخترعتا من عندي ، بل اقتبستا من قصة انا كتير بحبا وقررت انني احكيلكون ياها !!؟

كان ياما كان بقديم الزمان وسالف العصر والأوان ،كان في رجّال غني كتير وعندو مصاري مو عرفان وين يروح فيّون وكان عندو جار فقير كتير بيتمنّى الليرة ! وبيوم من الايّام شاف الغني الفقير وسألو كيفك ؟ قام قلّو الفقير:" والله الحالي عدم والعيشة صعبة بس الحمد الله على كل حال وعم فكّر بكرة روح على بير الحظ وفيّق حظي النايم" ، قام قلو الغني: "بطريقك قللو لحظّي اننو حاجة يبعتلي مصاري ودهب.. خلص انا اكتفيت" ... وقبل ما يطلع عطاه الغني ليرة دهب لأننو كتير زعل عليه.

تاني يوم راح هالفقير على بير الحظ ونادى حظ جارو ! قام قللو الحظ: " مين انت ؟ وشو بدك؟" قللو:"انا جار فلان وبيقلّك لا بقى تبعتلو دهب ومصاري !" قام قللو الحظ:" قِللو ما دخلو بدّي ابعتلو وزيدو"، قام تركو الفقير وبلّش ينادي حظو النّايم ! بلكي بيفيق ! " ياحظّي المعتّر ، يا حظّي المشحّر" قام فاق حظو وهو عم يتتاوب ! قللو:"مين انت ؟ وشو بدك ؟" قللو : "انا فلان، انت مين !" .. قم رد عليه الحظ و قللو: "انا حظّك المعتّر انا حظّك المشحّر، ط* فيك ط*، ط* فيك ط* "... قام قللو الفقير:" بدي ياك تصير متل حظ جاري وتعطيني دهب ومصاري" ، رد عليه الحظ :

ماعندي دهب اعطيك ولا مال ولا فضة

لا بظن رح ارضيك ولا بعتقد ترضى

قام قللو:" طيب بس عطيني متل هالليرة ميّة ، لحتّى سد ديوني !" فانصدم الحظ وقاللو: "انا اكيد كنت مشغول بشي لما وصلتك هالليرة لانني لو كنت منتبه ما كنت خليتك تاخدا" ، واختفى بالبير فجأة ... زعل الفقير ورجع ينادي حظوو، وهوي عم يناديه تفركش ووقعت مننو الليرة بالبير ...

ومن يوم ما سمعت هالقصّة، صرت لما يصير معي شي ما بيعجبني بغنّي:

"انا حظّك .....!! "